بقلم الشاعرة / زينب سليم
جايبلي دبلتين فضة .؟؟!!
وانا م الصدمة والخضة
كتمت القهرة …… جوايا
وبتماسك … عشان أهدى
لقيته كمان … بيتباهى
عشان العلبة ….. جواها
فاتورة … بقيمة الدبلة
وعاوز أمي …… تقرأها
وانا من حسرتي ساكته
حاسة بفرحتي .. باهته
ودمي بجد بقى محروق
كأني هموت ، وبالسكتة
قالي …. بفرحة ومودة
بقالي شهور ….. مابتغدا
وحلم حياتي اهو اتحقق
وجبت الدبلتين فضة..!!
صرخت أمي من غيظها
لما كلامه ……. نرفزها
وقالت ليه يانور عيني
الفضة … بنتي تحرزها
تكونش كاتعة أو حولة
دي حتى بتطلع الأولى
رُد الباب وراك وامشي
بلاها ….. الدبلتين دولا
ولو تاني تقول ياجواز
يكون وياك دهب وجهاز
وشقة كمان تكون تمليك
بناتنا عزاز أووي وألماظ
بناتنا عزاز أووي وألماظ
