بقلم الشاعر المبدع / رأفت عبد العال
تعرف تحسب حسبة بسيطة
وزع همك ع الأيام
عيش الدنيا بحالة فريدة
أضحك واجري شمر إيدك
واحلم إنك ليك جناحات
أصل الدنيا ليها ساعات
ساعة فرح وساعة جرح
هي مراية تشوف فيها صورتك
مرة سليمة ومرة بشرخ
لما تكشر تلقاها طرحت
فدادين هم !!!!!
ولما بتضحك تطرح فيها جناين ورد
ادي الدنيا ياغالي مسكن
علشان تسلم من مقالبها
أنسى الهم أصلك حتسبها
مين في الدنيا يطيق ملاعبها
تضحك ليك وتداري انيابها
زي رماد والنار من تحته
تعجن جسمك وتعيد نحته
المتغطي بيها عريان
تصبح سيرة كان ياما كان
زي حبيبنا فلان وفلان
عاش طول عمره فيها دفيان
أما الأن رحل الغالي وساب أطيان
