بقلم الشاعر المبدع / رأفت عبد العال
مش جاي أصحي قلب مات
ولا عمري هبكي ع اللي فات
لكن ساعات الذكريات
يرسم ملامحها السكات
من كام وكام !!!!!
كان الغرام يرعش قلوبنا بالهيام
لما عرفنا الخوف ملام
من كام وكام كُنا الغرام
ورسمنا خطاوينا سلام
لكن أكيد مش كل قلب
عاش سعيد !
ولا كل قلب مات شهيد !
مش جاي أغني ع النايات
ولا جاي أبكي ع اللي فات
أنا بس بفتكرك ساعات
بدخل قلوب الذكريات
يمكن الاقي عمر فات
جوه الحنين والأمنيات
جوه الزهور والأغنيات
رعشة وتر تحيي إللي فات
لمسة إيدين تسقي السكات
حلوة الحياة لما تكون جوه
القلوب نبضة نجاه
من كام وكام !!!!
لسه الغرام موجود هنا
موجود مع كتابي القديم
وعروق عيدان السوسنة
وعيون بتحلم باللي فات
ليها نظرة تحيي قلب مات
جوه الآهات برحل أنا
والذكريات والسوسنة
وحاجات بتعرفني أنا
ليهم أنين ليهم حنين
لكن أكيد مش كل قلب
عاش سعيد
ولا كل قلب مات شهيد
ولا في ربيع يحيي عيدان السوسنة
