كتبت / عبير سعيد
عماد حمدي اتعرف على شادية وهما فى قطار الرحمة وبعد تعارف ورسايل متبادلة وقصة حب قرروا أنهم يتجوزوا وكانت حياتهم ماشية سمن على عسل لحد ما بدأت اشاعات تتردد عن وجود قصة حب بين فريد الأطرش وشادية
وطبعا كانت مجرد اشاعة مالهاش اساس من الصحة
لكن يشاء القدر أن عمنا عماد يسافر السويس لشادية اللى كانت وقتها بتصور فيلم مع فريد الأطرش وطلب منها تستناه على المحطة، فشادية راحت تستناه ولما لقت القطر اتأخر رجعت على الاوتيل تستناه هناك..
طبعا عماد مالقاش شادية فى المحطة فاتضايق ولما دخل الاوتيل لقاها قاعدة مع فريد الأطرش وزمايلهم فى الفيلم بيضحكوا فدخل زى القطر وقالها : مش انا قايلك يا هانم تستنينى على المحطة فقالت له : انا استنيت فعلا ولما اتأخرت مشيت فرفع ايده لفوق تمهيدا لضربها فقالت له : لو ايدك اتمدت عليا تطلقنى، لكن عمنا عماد مسمعش الجملة ونزل بالقلم على وشها فطلعت تجرى على أوضتها وهو رجع على القاهرة
تانى يوم خلصت شادية التصوير ورجعت القاهرة وطلبت الطلاق، فعماد حمدي اعتذر لها عن القلم وقالها نبعد عن بعض شوية، لكن بعد الشوية ما انتهوا اصرت شادية على الطلاق فطلقها
