بقلم الشاعر المبدع/ رأفت عبد العال
ليه لما هب الريح
إيديك سابت إيدي
ونكرتي بينا وعود
ونسيتي مواعيدي
ورسمتي بينا حدود
مع إني بوريدك
ضميني ضمة حنان
يا فرحتي وعيدي
موجوعة فيا الروح
يا ساكنه بوريدي
وبتعزيني في شعوري
وبتقولي كلام بكاي
طب انتي ازاي تلوميني
وبتقولي إن أنا نسساي
شوفي انتي اللهفة في حنيني
شوفي انتي الشوق على جبيني
شوفي انتي الجاي
ياعمر ينبدر يطرح
يلف بشوقي ويرجع
دا لسه بتعزف النايات
ولسه بتنولد حكايات
ولسه الصبح بيعافر
ولسه في الحياة أوقات
ولسه بتنوجع آهات
ولسه الحلم متمرد
يحلق في الفضا شارد
ويرجع ينتظر ساعات
ولسه عيوني حضناكي
برغم البعد والترحال
بينبض قلبنا الطاير
ليومنا الجاي
تقولي كلام وبتلومي
على دا الحال
ولا عمر الحنين يبرد
ولا تقولي إن أنا نسساي
بلهفة تجيني واجيلك
نلملم عمرنا البكاي
ولا نهدا ولا نرتاح من الترحال
ولا تقولي إن أنا نسساي
