بقلم الشاعر / سامى النويهى
قالوا تحيا قُلت هىَّ
من قديم الدهر حيَّه
هىَّ شمس الكون وقمرُه
هىَّ أُم الدنيا ديَّا
هىَّ أُم الدنيا جَدْ
هىَّ نيل أهرام وسَدْ
هىَّ قبل مايبقى حَدْ
نور وعلم وإنسانيَّه
هىَّ دُرة كل عصر
هىَّ صاحبة أغلى نصر
واما تسمع إسم مصر
قوم أُقف أدى التحيَّه
التاريخ فوق الحجاره
يحكى عن أول حضاره
قال هنا مليون إشاره
فى النبوغ والعبقريَّه
للحبيب محراب سلام
للعدو الموت الزؤام
عمرها كام ألف عام
إنما شابَّه وعفيَّه
مصر رب الكون حاميها
فين تَجَلَّى إلا فيها
اللى أثنى الله عليها
راح تعيش حُره وأبيَّه
وان بَدا لموتها علامه
يبقى دا يوم القيامه
طول ماهِى بصحه وسلامه
فيه فى عُمر الكون بَقيَّه
