بقلم/محمد المساعيدي مساعيد
وعشان الفرحة بقت فلتر
والحزن كمان أصبح فلتر
فاوعاك يوم تيجى وتتراهن
على صدق الناس
ببساطة هاتفتح تليفونك
هتلاقى مواقع بتنزل فلتر إحساس
حبة ألوان ترسم ضحكة
كورسات فى الكدب وفى الإخلاص
لو كان تليفونك م الغالى
ومساحة ذاكرته كبيرة
هتلاقى برامج للجيرة
تقدر تشترى حبة عشرة
وبرامج مخصوص للسيرة
هتلاقى فلاتر لحقايق
وتلاقى فلاتر للعيرة
هتلاقى برامج للضحكة
وبرامج تعمل تكشيرة
هتلاقى برامج م الغالية
كورسات وبأرخص تسعيرة
هتلاقى برامج للحواديت
وفلاتر وهم انك حنيت
أو يمكن هتلاقى برامج
بتقول انك جايز حبيت
تقدر تشترى فلتر أوجاع
هتلاقى برامج للمتباع
وفلاتر هايلة لناس أتباع
هتلاقى برامج للأنطاع
أسرار وبيوت وحيطان ومشاع
هتلاقى برامج ل اللهفة
ومواقع تانية لحضن يساع
فلاتر تزود حنين العتاب
وفلتر قرارى يلم الصحاب
ونزل برامج تعيد اللى فات
تبدل ملامح تعيد الشباب
ونزل لى فلتر يلم الأحبة
ونزل برامج فتح مواقع
ولملم فلاتر
وضيف ع الحساب
محمد المساعيدي مساعيد
