الشاعر اللواء / محمد هيكل
الفراق ف الدنيا صعب
وفيه فراق لاساعات بينفع فيه عياطنا ولا السكوت
الفراق ف الدنيا رعب
بس أصعب فرقه توجع ………. لما يوم أمك تموت
.
لما تفتح يوم عيونك …….. وبدموعك ما تلاقيها
لما تلقى الدنيا فاضية …… م اللي كنت بتشتهيها
اللي كنت يوماتي تصحى بلمسه دافيه من إيديها
اللي كنت بتنسى همك ……… لما بضمك بروحها
واللي كنت بتستخبى …… م الزمن كله ف عنيها
.
موتى يامه …. !!!؟؟؟
موتي يامه .. ومين ياست الكل بعدك
راح يطبطب أو يحن
موتي يامه … وسبتي حته غاليه منك
عايشه جوه الخوف تئن
.
إحنا من بعدك يتامى … و أضعف الناس الغلابه
مين يكون أرحم عباده .. لما يبقوا الناس ديابه
مين يلم و مين يحابي …. لما تبقي الدنيا غابه
مين يشيل الحزن عنا
مين يخلي الدنيا جنه .. و يملا كل البيت طيابه
.
قالوا ع الأحزان بتهدا
وانتي حزنك ليه تمللي زي ضللي على الدوام !!!
قالوا ع النسيان دا نعمه
وانتي كل ما يوم يعدي
قلبي يبنيلك مقام !!!!
.
إلا فاكرك ……. !!!!!!
هوه انا إمتى نسيتك ……. للي بسألني إني فاكرك
وانتي ياما بتحلى سيرتك .. قد ما بيوجعتي ذكرك
يامه انا و الله أصلا
كل يوم عايش بذاكرك !!!!
.
من طفولتي اللي انتي شيلتي فيها دلعي و قمصتي
شكل لبسي .. ولون شرابي .. وسندوتشات شنطتي
والفطار واللمه واحنا …….. كلنا قاعدين ف حجرك
وحضن دافي الصبح بدري وحضن أدفى ف رجعتى
.
لما أخرج …… مره .. ألعب
لما كنت …… ف مره أتعب
كنتي ضل .. وكنتي حارس
كنتي بين الناس ….. كبيره
كنتي وسط الدنيـــــا فارس
و اما أبدأ ….. ف المذاكـره
كنتي يامه … مس شاطره
وانتي ماروحتيش مدارس
.
كنتي ف الاوجاع .. طبيبه
كنتي ف الأزمه … حكيمـه
لو حزنت …. بسرعه تجري
وتبقي حضن و تبقي خيمه
و ان ضحكت بلاقــي قلبك
م الفرح …….. عامل وليمه
دنيتي ….. كات بيكي إنتي
دنيا حلوه …… و ليها قيمه
أيوه كنتي ……. ست قلبي
و هيـه دي السـت العظيمـه
.
كنتي شمس مدفيانا ……. ومركبه بمليون شراع
كنتي ضهر كبير لابويا ……. وان أمر حتما يطاع
كنتي شايله بحب همــي و هم اخويا و هم أختي
كنتي شايله فوق كتافك حمل مايشيلهوش سباع
.
كنت بكبر يوم ب يوم واجري ف الدنيا ل نصيبي
ولسه بدلع عليكي ……. رغـم سني و رغم شيبي
كنت حابه فيا ميزتي … وحابه قبل الميزه عيبي
جوه عين الناس بحالها شوفت نفسي كبرت جدا
بس جوه عنيكي إنتي وقلبك انتي …. لسه بيبي
.
الشريط عمال يعدي ….. ب كل تفاصيله قصادي
للي عاشت بس تدي ب نيه صافيه وقلب راضي
اللي داق الكل …. خيرها
واللي عاشت لجل غيرها
واللي حرمت روحها ياما
وبحنان بتقول …. ولادي
.
كل حد ف يوم فارقنا ……. له كتير م الذكريات
نفتكرله الحلو مره …….. و أسوته علينا ساعات
إلا إنتي ………… ذكرياتك
كلها … حب ……. و سماح
كل شيئ .. كان حلو فيكي
و أي شيئ منك …… مباح
كنتي … عمر جميل يا امي
عمره … ما يعرف … جراح
.
هوه إيه ف الحزن يسـوى لو ماكانش الحزن ليكي
ولا إيه ف العمر يسوى لو ما اعيشي احزن عليكي
كل يوم بدعي ف سجـودي بكل لهفة شوق فقلبي
يجعل الجنه نصيبك .. والتقي …. ف الجنه بيكي
.
دا الفراق ف الدنيا صعب
وفيه فراق لا ساعات بينفع فيه عياطنا و لا السكوت
الفراق ف الدنيا رعب
بس أصعب فرقه توجع ……….. لما يوم أمك تموت
