بقلم الشاعر / سامي النويهي
اللى يُخرُج من حياتك
سيبُه يُخرُج بالسلامه
اللى هُنت عليه وفاتك
ودَّعُه بأحلى ابتسامه
واللى ناوى يمشى ينجز
لا ملامه ولا دموع
بس قبل مايمشى يحجز
تذكره من غير رجوع
دااللى سابك باختيارُه
خَدْ فى لحظة طيش قرارُه
هو فاكر لما يرجع
تبقى واقف فى انتظارُه
واللى بالغالى اشتريتُه
هو أول حد باعك
واللى قِدت ليه صوابعك
شكلُه كان عايز دراعك
إنت تدى مهما تدى
مش ح تلقى فــ يوم مسانده
أصل كلمة ياللا نفسى
هى دستور الزمن ده
فى الزمن دا ودى الحقيقه
صعب تلقى نفوس بريئه
كُله عايز واللى يدى
راح يحاسبك بالدقيقه
واللى خد فَكَّرْها عاده
خَدْ ومستنى الزياده
لو فى يوم قصرت تبقى
فى النظر محتاج إعاده
عيش بقى لنفسك كفايه
وابتدى بــــ تتر النهايه
إنت مش مفروض تطبطب
إنت مش دار للرعايه
