الشاعر/ خالد عمروني
ملكني خوف ف ليلة مطرة
زمان ف طفولتي
لما سمعت صوت بيقولي تقدر
وبعد شوية سمعت رعد
وشوفت ف البرق صورتي
والخوف اتملكني اكتر واكتر…
قمت باصص لنفسي
ف مرايتي
وبدأت حكايتي
وبدأت أحلم حلم فقير ..
عايز يكون
وتشوفه كل العيون ..
وبقيت استني المطرة
واغني تحتها واعزف ناي
واعزم برقه ورعده
ع كوباية شاي …
وأقوله لما يختفي باي باي..
وكإنه صديقي بفرح لوجوده
لما اشوفه ..
وازعل لو فارق وغاب ..
ده ال علم قلبي زمان
ينسي خوفه
وفتحلو لبكرة مليون باب …
ايوة انا وليالي الشتا والمطرة صحاب
كان برده السؤال
وضحكتي الجواب …
كنت حلم فقير
قلبه كبير
قال للحزن مع السلامة
واختار لقا بكرة بابتسامه
ومختارش الفشل والاكتئاب …
