كلمات الشاعر اللواء / محمد هيكل
إحمــد ربنــــا ……….. ياللي لقيـت
جزمــة أبـوك …… على بـاب البيـت
يعني حنـانه منـور جـوه ……. يعني أبوك في البيت موجـود
يعني أمـان بيزيدك قـوه ……. يعنـي هتفضــل بيـه مسنـــود
تفضل واقف على رجليك … ولافيش شيئ ف الكون يحنيك
يعني الستر و راحـة البال … كحـل تنــــام بيهـــم ف عنيـــك
عمرك يوم ماهتبقى بطولك … . طـول ما أبـــوك عنـك بيـرد
مهما تزيد ف الدنيا حمولك ….. هوه اللي يشيل واللي يسـد
جزمـة أبـوك على باب الدار ….. ضهر و عزوة و خير و عمار
زي إتنيـن حـراس ب سـلاح …… صاحيه عنيهم ليل و نهــار
هوه أبوك مين زيه صحيح … مين في حنانه وطيبته عليك
طول مهو رايح شايلك همك .. طول مهو راجع يحضن فيك
خبطة أبوك ع الباب دي كفايه …… تحضن روحك و تدفيك
دا اللي لا قال نفسي و لا منـايا ….. لكـن كل منــاه يرضيـك
صـوت كحتـه لمـا بيتوضـى ….. تمــلا الصـاله أصـاله و نـور
ريحة أبوك ف البيت لو عدّى ….. أحـلا كتير من أحـلا بخور
صوت ضحكته لو جالكو ضيوف..لون سبحته وعبايته الصوف
شـاله الابيض على سجادته .. يرقوا حيطان البيت م الخوف
حتى ان غـاب أو سـاب البيت … تلقـى روايحه ف كل مكان
صورة ابوك وحدهـا ع الحيط … خيمــه بتستـر م الأحـــزان
هـوه الأصـل و هـوه السيـره … ولا يغنيـك عنه ان كان ميـن
أصل وجـوده دي نعمة كبيرة … مابتعـرفهـاش غيـر بعــدين
روح ….. و اتغــرّب …….. لـف و طــوف
و يـوم ما هترجــع … و تقــول … جيـت
إحمــد … ربنــــا ………… لمـا تشــــوف
جـزمــة أبــوك ………. علي بــاب البيـت
