بقلم الشاعر المبدع / رأفت عبد العال
شبابيك الغربة بتصرخ ليه
مع إن عيونها إزاز وحريق
بتخبي في جوفها بحر غريق
وتحني عيون الليل بشهيق
مخنوق الشوق جواك يا غريب
نداهة عليك ترمي الأباريق
مشوراك رايح مش راجع
لو حتى رجعت دفعت العمر
وربحت الورقة الخسرانة
وواصلت الليل بالشوق والويل
وبعت عيونك للمرسى
بتعد رجوعك كام مرة
وشعورك شايب م الغربة
نشعت بعيونك كام دمعة
وخطاوي تاهت في الزحمة
سابت بجفونك كام دهشة
ونسيت عنوانك لاجل تشب
الوهم على جبينك علم
وكابوس الحلم يتوه في العمر
والخوف المتحني بوهمه
يهديلك عكازة الدايب
دي فاتورة الحلم اللي اتغرب
مختومة ياغالي بحبر العمر
