كتبت / عبير سعيد
قرر الفنان الكبير محمود المليجى هو زوجته الفنانة القديرة علوية جميل أنهم ينقلوا مقر اقامتهم الى بيت جديد.
كانت علوية عندها صورة كبيرة معلقة فى الصالون وتعتز بها جدا لدرجة أنها في مره عملت مشكلة كبيره لما لقت حد من الخدم بيمسح الصورة قبل ما يغسل ايديه !!!
ولان محمود كان بيخاف على زعل علوية ومن زعل علوية شويه.. قال اشيل الصورة بنفسى واحنا بننقلها بدل ما الصوره يحصلها حاجة ويبقى اليوم مالوش نهار .
قام شال الصورة وفجأة وهو ماشى بيها اتكعبل ووقع والبرواز اتكسر والازاز قطع اللوحة..
طبعا علوية دقت طبول الخطر وفتحت تحقيق مع كل الخدم والشغالين وطبعا كلهم انكروا.
فبدأت تشك أن محمود زوجها هو اللى ورا الموضوع،لكن لما واجهته أنكر وقالها أنه ميعرفش حاجة عن اللى حصل، وبما ان السيئة تعم والحسنة تخص قررت علوية انها تخصم تمن البرواز الثمين من مرتبات الخدم والشغالين.
ولما بلغت محمود المليجي على القرار وافق فورا علشان ما تزعلش.. وراح من وراها حاسبهم علي كل الفلوس اللى اتخصمت منهم علشان يراضيهم
