كلمات / سامى النويهى
بحبك يابلدى بحبك أكيد
بحبك وحبك غرامى الوحيد
وروحى فِداكى وعزى فـــ عُلاكى
وغنوه فـــ هواكى دى أجمل نشيد
بحبك وحُبِّكْ فى قلبى استَقَر
وقلبى اعترف لِك بحبُه وأقَر
بِعدت وفارقتِك وحُبى استَمَر
بحبك قُريب واحبك بعيد
بحبك بسيطه وواعيه وحويطه
وعايقه وجميله وزاينه الخريطه
بحبك وفيَّه بتنسِى الأسيَه
واحبك قويه وقلبك حديد
بحبك مَزارِع واحبك غيطان
واحب اللى زارع فى أرضك عيدان
وقمرك مِهَدّى وليلك مِعَدّى
وشجرك مِنَدّى وفَجْرِكْ وليد
بحبك معالِم واحبك آثار
أشوفك فى ليلك بعكس النهار
واحبك شواطئ لأجمل بحار
فى شرم ومراقيا وجمصه ورشيد
بحبك حوريه ونجمه فى ليلى
واحبك غوريه وخان الخليلى
ونورك مِلَعْلَعْ على شط نيلى
وسهره لمطْلَع نهارى الجديد
بحبك نسايم فى مدح الأمين
رحاب أم هاشم وسيدنا الحُسين
ياهاديه الحيارى ياحاضنه السهارى
ياساكنه بجداره فى قلب الوريد
بحبك يابلدى على أى حال
واحب اللى حَبِّكْ وعَبَّرْ وقال
وح افضل أشوفك فى غاية الجمال
واغنى لعيونك واكرر واعيد
بحبك يابلدى بحبك أكيد
