بقلم الشاعر المبدع / رأفت عبد العال
تعرفيني لما الدموع على
خد شوقك تترسم
توعديني ونبتدي من تاني
نحضن الحياة ونبتسم
ليه بعتي عمري الغالي ليه
وجانيتي ايه ؟
مين فينا باع من إللي ضاع
بعد البراح
مين إللي باع داق الضنى
والحلم راح مبقاش براح
في عمرنا
ملامحنا غيرها الزمن
احنا إللي كنا للربيع السوسنة
كنا الدفا كنا الوفا
مين إللي راح من غير تمن
مين إللي باع وزرع سنين
العمر بسنين الضياع
والحلم راح مبقاش براح
آهين وآ ه تاه عمرنا
دلوقتي جايه تقولي إيه
وبترجعي من تاني ليه
ياعمر بتندم عليه
ياعمر ودع عمرنا
ياللي زرعتي الشوق بشوك
جانيتي ايه غير الدموع
ضاع الطريق مبقاش رجوع
ضاع عمرنا
ليه بعتي حبي بالرخيص
وقبضتي من عمري التمن
الله يعوض ع إللي راح
جانيتي إيه غير الجراح
وحصدتي إيه غير الندم
