بقلم الشاعر / سامى النويهى
وبقينا ازاى كده
قاسيين بالشكل ده
مُعظم أوقاتنا ضايع
فى صراع بين دا ودا
بنْجَرَّح فى الحبايب
وبنِفْرَح فى المصايب
وحال زمن العجايب
بقى حالنا كُلنا
بقينا بِنِمْشي فى الممنوع
وفـــ خلافنا الزعل مشروع
ونِتنَمَّر على الموجوع
من قسوة قلبنا
بنشمت حتى فى الأموات
بنخلق م العدم أزمات
وبنضَيَّع فى جلد الذات
سنين من عُمرنا
ولبعض بنمسك ع الواحده
ومش طايقين بعض
وفاضل لنا تكه ونتخانق
مع طوب الأرض
نازلين كُلنا أكل فـــ بعضنا
عايزين ربنا يرحمنا إزاى
دا يدوب بنعدى من السيئ
بنلاقى وراه الأسوأ جاى
