بقلم الشاعر المبدع / رأفت عبد العال
مش قولتلي أنا بكرة جاي
أهو بكرة فات ولا خدت
منك غير آهات
أنا بسألك آه أنا بسألك
ليه لما تبعد بلقى في عيون
النهار حيرة وقلق
وألقاني أجري هناك
أدور عن حاجة منك
في الزوايا والورق
وألقاني غيمة في السما
وألقى الساعات متألمة
مش قولتلي
أنا بكرة جايلك بالهنا
وفضلت من شوقي هنا
أحسب ساعات عمري اللي فات
وياريت ياريت تيجي هنا
ياللي ف عنيك بلقى
الحياة متنغمة
هفضل هنا كنا هنا
آخر مكان كنا هنا
حساك وحاسسني أنا
لسه عقود الفل تسمع همسنا
والنجمة دي كانت بتحسدني أنا
ياللي معاك نفس المكان داق الهنا
ليه النجوم غابت معاك
غابت وتاهت فى السما
ياللي في عنيك
أنا بلقى صورتي ملونة
طب ليه تغيب عني أنا
طب لما غبت
ما عرفت نفسي مين أنا
ولا نورت تاني الحاجات
ولا بكرة جالي بحكايات
وأهو عمري فات
أهو عمري فات
ولا خدت منك غير آهات
ولا نورت
تاني النجوم قلب السما
ولا يوم رجع ليا الهنا
طلع النهار
وأهو بكرة فات
والذكريات كانت هنا
وفضلت بدموعي أنا
