كلمات / سامى النويهى
وبقول يادنيا على الملأ آسف ظَلَمْتِكْ
آسف معدتش أَزَعَّلِكْ واجْرَح كَرَامْتِكْ
أنا كنت فاهِم بالغلط صَبْرِكْ وصَمْتِكْ
واما عِرِفْتِكْ صَحْ انا بجد احْتَرَمْتِكْ
آسف معدتش أحَمِّلِكْ ذنب اللى ضاع
ولا ذنب قلب آمنت لُه وخانّى وباع
و لا ذنب صاحب كُنت لُه ضهر وسند
وقابلنى يوم ماحتَجت لُه بمكر وخداع
ياللى الإله أبدع فأحْسَن خِلْقِتِكْ
من حبى فيكى انا جاى أبرَّأ ذِمِّتِكْ
حُضنك حياه وان حد تاه مش غَلْطِتِكْ
دا احنا الجُناه وسلوكنا سَوَّأ سُمْعِتِكْ
نِكْدِبْ يادنيا ان قُلنا سِر تعبنا فيكى
الشر فينا يادنيا وانتى الخير ماليكى
قاسيين وقسوة قلبنا بَكِّتْ عنيكى
عايشين بناكل بعضنا ونلوم عليكى
قُلنا غروره وكدابه ولا ليكى أمان
غداره وان حد آمنلِك لازم يتخان
بس الحقيقه انتى بريئه اليوم وزمان
وماجارش ع الإنسان إلا أخوه الإنسان
