بقلم الشاعرة / زينب سليم أحمد
مش ندمانة عشان قدرتك
ولا ساعدتك …… أو كبرتك
أنا عبرت معاك عن طيبتي
بسذاجة .. خليتني اختارتك
ليه انا اندم ع اللي عملته؟؟
دانت قُليل ، أنا كترته ….!!!
ضهر وسندك … انت كسرته
وطبيعي … افرح بخسارتك
عيش الدنيا بعدي …. ودوٌر
اخدع غيري …. ولف وحوٌر
اوعى تفكر ….. راح تتهنى
ولا تستنى …… أو تتصوٌر
انك ليا …… هتبقى خسارة
ولا هعيش بعدك محتارة
الدنيا بسرعة ……. دوارة
وشمسي رجعت تاني تنوٌر
وبقيت احلامي .. بحددها
واما بحققها …….. بجددها
لكن انت …. هتعيش محتار
جواك نار ومحال تخمدها
عادي اتحمل نارها وجرب
بهمومك …… شرق أو غرب
واياك تاني ….. مني تقرب
دي فاتورة غدرك سددها
وبقيت ماضي كأنه ماكان
اتعلمت أنا منه كمان …!!!!
إن الخاين ….. يغلبه أصله
كارثة ……. لو تديله أمان
وبدأت اتنفس …. من تاني
اتخطيت . فشلي وأحزاني
بحب جميل عوض حرماني
وانت بقيت .. طي النسيان
