أنا والأمثال وبنت الحداد

بقلم / حسين عبد اللطيف

قالولي الناس
أمشي عدل يحتار عدوك فيك
و حاسب قبل ما تناسب
و بفلوسك بنت السلطان عروسك
قولت يا ناس من جاور الحداد ينكوي بناره
و سيبوني اتغدى بيه قبل ما يتعشى بيا
قالولي ابعد عن السهتانة ام كحلة و لبانة
قولت اهي ليلة و فراقها صبح
أتاري مراية الحب عميا
و انا اللي كنت فاكر هيلاقيني و لا يغديني
طلع همه على بطنه
قالولي الجعان يحلم بسوق العيش
ياريتني اديت العيش لخبازه و لو اكل نصه
طب و أنت ايه اللي رماك على المر؟؟
قولت اللي أمر منه
اديني عمر و أرميني البحر
قولت خبطتين في الرأس توجع
بس ربك حليم ستار
و كل عقدة و ليها حلال
و كل فولة و ليها كيال
و بصلة المحب خروف
و الكلب في بيته سبع
يا سيدي نقول طور تقول احلبوه
دا ياما دقت على الرأس طبول
د اللي مايشوفش من الغربال يبقى أعمى
و لا انت الطمع عماك
و لا القرد في عين امه غزال
و يا واخد القرد على ماله
بكرة يروح المال و يبقى القرد على حاله
دا هوه اللي اتمسكن لحد ما تمكن
حبيتها
قالولي صحيح اللي اختشوا ماتوا
سيبها
يموت الزمار و صوابعه بتلعب
قولت :
يا ناس الغايب حجته معاه
و اللي يجاور السعيد يسعد
و ان دبلت الوردة ريحتها فيها
صحيح اللي يناسب الحداد ينكوي بناره
و تكفي القدرة على فمها تطلع البنت لأمها
و نابي جه على شونة